Gjermania ndryshon rregullat e azilit në favor të refugjatëve queer

Gjermania do të zbatojë rregulla të reja duke filluar nga e shtuna për përpunimin e kërkesave për azil nga personat LGBTQ+, tha Ministrja e Brendshme gjermane Nancy Faeser.

Faeser tha të premten se dëshironte të mbronte më mirë refugjatët queer dhe se askush nuk duhet të “ndihet i detyruar të bëjë një jetë të rrezikshme të dyfishtë”.

Zyra Federale për Migracionin dhe Refugjatët është udhëzuar të marrë në konsideratë njerëzit queer në rrezik të barabartë në vendin e tyre të origjinës, pavarësisht nëse ata shprehin hapur ose jo identitetin e tyre gjinor dhe orientimin seksual.

Sven Lehmann, komisioneri i qeverisë federale për pranimin e diversitetit seksual dhe gjinor, tha të premten se persekutimi në bazë të “orientimit seksual dhe identitetit gjinor është një bazë e njohur për azil”.

Deri më tani, Gjermania u jepte azile refugjatëve queer që iknin nga persekutimi, ku përkufizonte persekutimin si njerëz që kërcënoheshin me dhunë, vdekje, burgim ose lloje të tjera trajtimesh çnjerëzore për shkak të identitetit të tyre seksual, sipas faqes zyrtare të Gjermanisë për refugjatët queer.

Natyra e shpeshtësisë së akteve të persekutimit ose diskriminimit duhet të jetë aq ekstreme sa të përbëjnë shkelje të të drejtave të njeriut, tha uebfaqja.

Fakti që homoseksualiteti dënohet me ligj nuk përbën në vetvete një akt persekutimi, shtoi faqja e internetit.

Një proces me dy hapa do të përcaktojë nëse refugjatëve queer do t’u jepet azil, tha Faeser.

Faeser është në krye të Ministrisë Federale të Brendshme dhe Komunitetit, e cila mbulon një sërë detyrash, duke përfshirë integrimin e njerëzve në shoqëri dhe mbrojtjen civile dhe sigurinë.

Lajmi është publikuar nga DW dhe është përkthyer në shqip nga Dylberizm.