Mos i voto homofobat!

Partitë politike përgjatë fushatës zgjedhore janë duke heshtur sa i përket të drejtave të personave LGBTIQ+. Në programet e tyre qeverisëse nuk përfshihet mirëqenia e personave LGBTIQ+ e as ndonjë plan për luftimin e shtypjes sistematike ndaj komunitetit LGBTIQ+.

Neglizhenca e vazhdueshme e institucioneve ndaj komunitetit LGBTIQ+ është një prej arsyeve kryesore që ka shtyrë deri në pozitën e personave LGBTIQ+ në shoqëri, të cilët vazhdojnë të jenë të shtypur dhe diskriminuar.

Kjo pozitë e personave LGBTIQ+ në shoqëri është rënduar edhe më shumë për shkak të pandemisë. Gjatë kësaj kohe pandemie, personat LGBTIQ+, përveç shtypjes sistematike, janë përballur edhe me dhunë në familje si pasojë e izolimit/karantinimit, probleme financiare, vështirësi për t’u punësuar, probleme me strehim si rezultat i pasigurisë dhe rrezikut për t’u kthyer në shtëpi—për shkak të trajtimit jo të dinjitetshëm dhe dhunës psikologjike, ekonomike, fizike dhe po ashtu janë përballur edhe me probleme të shëndetit mendor.

Në bazë të kërkesave dhe nevojave të paraqitura nga personat LGBTI+ përgjatë kësaj periudhe, viti 2020 mund të konsiderohet si ndër vitet më sfiduese dhe problematike karrshi mirëqenies së komunitetit.

Është përgjegjësi dhe obligim i liderëve të shtetit dhe personave në pozita vendimmarrëse, institucioneve shtetërore dhe qeverisë që të ndërmarrin hapa konkretë dhe të sigurojnë mirëqenien e qytetarëve LGBTIQ+, pasi që të njëjtëve u garantohen të drejta të barabarta me Kushtetutë si çdo qytetarë tjetër i Republikës së Kosovës.

Si rezultat i neglizhencës së partive politike gjatë fushatës zgjedhore të zgjedhjeve të parakohshme parlamentare të 14 shkurtit, nëpërmjet kësaj deklarate:

Ne, ju bëjmë thirrje partive politike që në vazhdën e fushatës së tyre, të tregojnë haptazi qëndrimin e tyre karshi komunitetit LGBTIQ+ dhe të shpjegojnë mospërfshirjen e të drejtave LGBTIQ+ në plan programet e tyre.

Është e dukshme dhe e pamohueshme që partitë politike kanë mungesë të informacioneve rreth komunitetit LGBTIQ+. Por, përjashtimi i një grupi të margjinializuar shoqëror nga planet e tyre qeverisëse është i neveritshëm, rrezikshëm dhe alarmues.

Personave LGBTIQ+ dhe aleatëve, si qytetarë të Republikës së Kosovës me të drejtë vote, ju bëjmë thirrje të mos i votojnë deputetët, emrat e të cilëve gjenden në listën e poshtëshënuar. Këta deputetë janë shprehur kundër apo neutral karshi të drejtës kushtetuese të personave LGBTIQ+ për martesë mes së njëjtës gjini. Liritë dhe të drejtat LGBTIQ+ nuk duhet të privohen për shkak të mendimeve homofobike e transfobike të deputetëve, detyrë e të cilëve është mirëqenia e qytetarëve të Kosovës dhe përfaqësimi dinjitoz i tyre dhe interesave të tyre.