Polonia nuk do ta lejojë BE-në që ta ‘detyrojë’ atë të lejojë martesat gej, thotë ministri i drejtësisë
Ministri i drejtësisë i Polonisë tha të hënën se Bashkimi Evropian mund të jetë në gjendje të detyrojë Varshavën të legalizojë martesën gej nëse udhëheqësit e BE-së e bëjnë ndihmën financiare të kushtëzuar nga respektimi i normave demokratike, dhe paralajmëroi se kjo ishte e papranueshme.
Në bisedimet në Bruksel për buxhetin e ardhshëm të BE-së dhe planin e rimëkëmbjes ekonomike, disa liderë kanë kërkuar që pagesa të bllokohet për shtetet anëtare, të cilat Komisioni Evropian ekzekutiv (KE) vlerëson se dëmtojnë vlerat demokratike.
Ministri i Drejtësisë Zbigniew Ziobro tha që kjo do t’i jepte Brukselit mundësinë e bllokimit “arbitrarisht” të pagesave me vlerë miliarda euro, raporton Reuters.
“Ekziston një rrezik i vërtetë që ne mund të gjendemi në një situatë kur KE do të na detyrojë në mënyrë efektive të prezantojmë të ashtuquajturat martesa gej me të drejtën e birësimit të fëmijëve,” ai tha para një konference.
“Epo, ne nuk mund të pajtohemi me këtë në asnjë rrethanë.”
Partia në pushtet për Ligj dhe Drejtësi (PiS) erdhi në pushtet pesë vjet më parë me një zotim për të mbrojtur vlerat tradicionale të familjes. Martesat gej janë të paligjshme në Poloni dhe Presidenti homofobik Andrzej Duda u rizgjodh këtë muaj pasi tha se ai nuk do të lejonte birësime nga çifte homoseksuale ose të lejojë mësim për të drejtat e homoseksualëve në shkollat shtetërore.
Aktivistja për të drejtat LGBTQ+ Alicja Sienkiewicz nga Shoqata e Marshit të Barazisë në Lublin, e cila mbështet njerëz lezbike, gej, biseksual dhe transgjinor, tha që anëtarët e komunitetit LGBTQ+ po portretizohen si armiq të shtetit.
“Kjo është e çuditshme. Nëse doni të merrni këto fonde (nga BE), ju duhet të pranoni automatikisht se si BE-ja pret që ato të shpenzohen, sepse respektimi i sundimit të ligjit nënkupton respektimin e të drejtave themelore të njeriut dhe ka të bëjë me respektimin e tyre, “tha ajo.
Polonia është në mospajtim me Komisionin Evropian për disa çështje, përfshirë reformat gjyqësore për të cilat Brukseli thotë se minojnë pavarësinë e gjyqësorit. Qeveria thotë se reformat janë të nevojshme për të rregulluar sistemin e epokës komuniste.
