Homofobët vandalizojnë zyrën e organizatës QIKA
![](https://i0.wp.com/www.dylberizm.com/wp-content/uploads/2024/06/IMG-9861-scaled.jpg?fit=1600%2C1200&ssl=1)
Qendra për Informim, Kritikë dhe Aksion – QIKA, një organizatë feministe që lufton për barazi gjinore dhe të drejtat e njeriut, është vandalizuar nga persona të panjohur. Stafi i QIKA ka vërejtur në mëngjesin e sotëm se tabela me logon e organizatës jo-qeveritare është vadalizuar me sprej të zi. Koha e saktë dhe autorët e krimit nuk dihen mirëpo rasti është lajmëruar sot në Policinë e Kosovës.
Ky sulm dyshohet të vijë si pasojë e homofobisë, transfobisë dhe bifobisë të vazhdueshme që po ndodhë në Kosovë.
QIKA mbështet hapur personat LGBTIQ+ dhe në solidaritet me Javën e Krenarisë kanë vendosur flamurin LGBTIQ+ në ballkonin e tyre, njashtu gjatë ditës se djeshme kanë publikuar edhe një emision “Ngjyrat e dashurisë”, ku flitet mbi gjininë, seksualitetin dhe të drejtat e dylberave në përgjithësi.
“Në vazhdën e sulmeve homofobike, bifobike e transfobike ndaj personave LGBTIQ+ dhe mbështetësve, është sulmuar zyra e QIKA në Prishtinë.
Pas transmetimit të emisionit “Ngjyrat e dashurisë”, vendosjes së flamurit të komunitetit në ballkonin e QIKA-s, dhe raportimeve të vazhdueshme mbi aktivitetet e Javës së Krenarisë, persona të panjohur kanë vandalizuar me sprej me ngjyrë të zezë logon pranë zyrës së QIKA-s”, thuhet ne reagimin e QIKA-s.
Ndër të tjerash, QIKA shprehë se puna dhe angazhimi tyre për barazinë e lirinë e gjithësecilit/ës nuk do të ndalet.
“Ky është sulm ndaj medias dhe ndaj aktivizimit për të drejtat e njeriut. Homofobia nuk na ndalë. QIKA qëndron me dashurinë dhe lirinë e secilës e secilit për të qenë vetja”, shkruan QIKA.
Kujtojmë se ky nuk është sulmi i vetëm homofobik që ndodhi përgjatë Javës së Krenarisë. Në mëngjesin e datës 7 qershor zebrat e ngjyrosura me ngjyrat e ylberit në aksionin rrugor para Hotel Grand, u vandalizuan me mbishkrime homofobike, transfobike dhe bifobike, sulm i cili u dënua edhe nga Avokati i Popullit.