Dështon referendumi anti-LGBT në Hungari

Duke përdorur urrejtjen dhe propagandën anti-LGBT+ si disa nga gurëthemelët e fushatës së tij, Viktor Orbán dhe partia e tij e krahut të djathtë, Fidesz, siguruan një mandat të katërt në zgjedhjet e përgjithshme të së dielës (3 prill).

Qeveria Fidesz është bërë gjithnjë e më armiqësore ndaj komunitetit queer, duke ndaluar birësimet për çiftet e të njëjtit seks, duke i dhënë fund njohjes ligjore të gjinisë për personat trans dhe duke kufizuar përmbajtjen që përshkruan personat LGBT+.

Në të njëjtën ditë me zgjedhjet, Orbán u përpoq të betonoj sulmin e tij të fundit ndaj të drejtave LGBT+ me një referendum të ngarkuar mbi arsimin gjithëpërfshirës dhe fëmijët trans. Megjithëse 90 për qind e votuesve mbështetën pozicionin e Orbanit, nuk kishte vota të mjaftueshme që ai të bëhej ligjërisht i detyrueshëm.

Kryeministri Viktor Orbán njoftoi verën e kaluar, pak pasi hyri në fuqi i ashtuquajturi ligji kundër pedofilisë, se qeveria do të niste një referendum për çështjen e mbrojtjes së fëmijëve. Orbán e justifikoi vendimin e qeverisë duke thënë se “Brukseli ka sulmuar qartë Hungarinë në javët e fundit për shkak të ligjit për mbrojtjen e fëmijëve”.

Rreth 20% e votuesve hodhën votë të pavlefshme të dielën për katër pyetjet ose nuk kërkuan as fletën e votimit të referendumit, vetëm ato për zgjedhjet e përgjithshme.

Referendumi kombëtar është i vlefshëm nëse më shumë se gjysma e të gjithë votuesve kanë votuar në mënyrë të vlefshme dhe është i suksesshëm nëse më shumë se gjysma e votuesve që kanë votuar japin të njëjtën përgjigje për pyetjen.

Në rastin e referendumit aktual, pragu i vlefshmërisë ishte 4,107,652.

Por Budapest Pride është i vendosur të qëndrojë dhe të luftojë. “Mos harroni: ju nuk jeni vetëm”, shkroi komiteti në Facebook.

“Hungaria nuk është e hapur ndaj nxitjes së urrejtjes kundër personave LGBT+”.

Johanna Majercsik, një zëdhënëse e Budapest Pride, tha për PinkNews se organizata është e vendosur të vazhdojë punën e saj, edhe përballë goditjeve të qeverisë.

“Çfarëdo politika që ndjek qeveria aktuale e Hungarisë, nëse ata vlerësojnë punën tonë ose përpiqen të na mbyllin, ne do të jemi këtu dhe do të punojmë për interesin e njerëzve LGBTQ” tha ajo.

Megjithëse ikja është një përgjigje e kuptueshme, Majercsik beson se shumica e njerëzve LGBT+ do të qëndrojnë në vend pavarësisht rezultatit të zgjedhjeve.